ANGGO adong dakdanak ni “Anggota Sidi” GKPS na parah boritan na lape tardidi boi do pamasaon pandidion bani janah ai ma na igoran pandidion na tarolos
Usahahonon ni orangtua ni dakdanak ai do mandilo parhorja ni kuria (Pandita, Penginjil, Sintua atap Syamas) laho mandidi dakdanak ai. Pori lang sompat be sonai, boi do homa age na lang parhorja ni Kuria asal ma anggota Sidi mangadongkon pandidion ai.
Sonon ma ranggi ni horja ai:
Paragenda :
lbagas goran ni Naibata Bapa pakon Tuhan Jesus Kristus ampa Tonduy Na Pansing Sitompa langit pakon tanoh on. Amen.
Sungkun-sungkun
Nasiam na hinaholongan ni Tuhanta Jesus Kristus! Ipindo uhur nasiam do sonari didion dakdanak on hubagas goran ni Naibata Bapa pakon Tuhan Jesus Kristus ampa Tonduy Na Pansing?
(Balosni : Ipindo uhumami do)
Pandidion
Ham ……………… Hudidi ma ham hubagas goran ni Naibata Bapa pakon Tuhan Jesus Kristus ampa Tonduy Na Pansing. Amen.
Paragenda :
Martonggo ma hita! Ham Jahowa, Naibata paridop ni uhur, Bapanami ibagas Jesus Kristus Tuhannami. Ibotoh hanami na dohor do Ham i lambung ni sagala na porsaya na mandilo goran-Mu janah itangihon Ham do sidea. Tarimakasih ma Bamu halani domma parsimada dakdanak on bani harajaon-Mu. Pangindoannami bere Ham ma hatnalumon bani dakdanak on, janah ondos hu tangan-Mu ma ia manggoluh barang matei. Ambah ni ai patotap Ham ma haporsayaon ni na matorasni pakon ganup sindohorni ase tongtong martenger ni uhur. Amen.
Riap ma hita martonggo marhitei tonggo na niajarhon ni Tuhan Jesus hubanta!
Ham Bapanami na i nagori atas. Sai Na Papansing ma goran-Mu! Sai roh ma harajaon-Mu. Sai saud ma harosuh ni uhur-Mu i nagori tongah on songon na i flagon i atas. Bere Ham ma bannami sadari on hagoluhan an-an. Sasap Ham ma dousanami songon panasapnami bani dousa ni hasoman na mardousa dompak hanami. Ulang hanami bobai Ham hu parlajouan. Paluah Ham ma hanami humbani pangagou. Ai Ham do simada harajaon, pakon hagogohon ampa hasangapon sadokah ni dokahni. Amen.
Pasu-pasu
Idop ni uhur ni Tuhan Jesus Kristus pakon holong ni atei ni Naibata Bapa ampa parsaoran ni Tonduy Napansing ma mangkasomani hita (nasiam) haganup. Amen.